Кашни кун хаваслă
Уроксем хыççăн тăтăшах тĕрлĕ мероприятисем иртеççĕ Вутлан шкулĕнче. Нарăс уйăхĕн малтанхи кунĕсенче агитбригадăсен çут çанталăка упрассипе çыхăннă конкурсĕ иртрĕ. Пуçламăш классенче вĕренекенсем вăрман, чĕр чун, кайăк-кĕшĕк çинчен сăвăсем каларĕç. 5–9-мĕш классем агитбригадăсем хатĕрленĕ. Вĕсем хушшинче 6-мĕш классем пĕрремĕш вырăн йышăнчĕç, 7-мĕш класра вĕренекенсем – иккĕмĕш, 5, 9-мĕш классем – виççĕмĕш вырăнта.
Кун хыççăнах шкулти «спорт министерстви» тата физкультура учителĕ К.Громов пăшалтан перессипе ăмăрту йĕркелерĕç. Унта 7 команда хутшăнчĕ. Арçын ачасем хушшинче 6-мĕш класра вĕренекен Геннадий Леонтьев палăрчĕ, хĕр ачасенчен – 9-мĕш класри Олеся Афанасьева. Командăсем хушшинче 9-мĕш класра вĕренекенсем çĕнтерÿçĕ пулса тăчĕç, 6-мĕш классем – иккĕмĕш вырăнта. Çĕнтерÿçĕсене Хисеп хучĕсемпе чысларĕç.