Шкул ачисене çут çанталăка упрама, тăван тавралăха юратма вĕрентес тĕллевпе пĕтĕмĕшле пĕлÿ паракан учрежденисенчи экологи агитбригадисен республика шайĕнчи конкурсĕн районти тапхăрĕ иртрĕ. Кашнин “Акă мĕн эпир каласшăн – çут çанталăка сыхласшăн!” темăпа сценарин электронлă вариантне тăратмалла пулчĕ. Пĕрремĕш турта эксперт ушкăнĕ 20 сценари пăхса тухса 10-ĕшне суйласа илсе иккĕмĕш турта хутшăнма ирĕк пачĕ. Февралĕн 19-мĕшĕнче чи лайăххисен шутĕнчи агитбригадăсем сценарисене хÿтĕлерĕç. Элĕк шкулĕн ушкăнĕ çĕнтерÿçĕ ятне çĕнсе илчĕ. Иккĕмĕш вырăнта – Юнтапа шкулĕ (Вырăс Сурăм салинчи), виççĕмĕшĕнче – Мăн Ямаш шкулĕн агитбригади. Çĕнтерÿçĕ-ушкăн республикăра куçăмлă мар майпа иртекен конкурсăн иккĕмĕш тапхăрне хутшăнĕ.