Районта чрезвычайлă лару-тăруран асăрханас тĕлĕшпе оперативлă комисси туса хунине пĕлтернĕччĕ ĕнтĕ. Унта районти лару-тăрăва тишкернĕ. Çанталăк сивĕ тăнине пула электроэнергипе тата газпа усă курасси палăрмаллах ÿснĕ. Хальхи вăхăтра улма-çырла комбиначĕ, строительство материалĕсем кăларакан завод тата хăш-пĕр шкулсем лимитпа уйăрнинчен ытларах газ çунтарма пуçланă.

Ларура çапла йышăннă: культура çурчĕсемпе шкулсене ытлашши ăшăтмалла мар, культура учрежденийĕсенче кану мероприятисем ирттерессине вăхăтлăха чармалла, спортзалсенче те каçсерен вăйăсем выляттарма кĕртес çук. Ялсенче пурăнакансен газпа виçеллĕ усă курмалла, тенĕ комисси членĕсем.