Ал ĕç ăстисем кашни ялтах тенĕ пекех пур. Пĕри йывăçран пĕр-пĕр япала ăсталама, тепри тĕрĕ эрешлеме юратать. Иртнĕ кунсенче Элекри ял тăрăхĕсем хушшинчи культурăпа кану центрне тĕрлĕ татăк-кĕсĕкрен çĕлеме юратакансем пухăнчĕç. «Татăк-кĕсĕк мозаики» ятпа курав иртрĕ. Кунта хутшăнакансем панносем, утиялсем, çемçе теттесем, çи-пуç хатĕрлесе килнĕ. Кĕçĕн Тăванти Пелагея Вавилован, Мăн Вылăри  Ольга Ефремован, Тушкассинчи Дина Иванован, Лидия Егорован, Качалаври Елена Львован ĕçĕсене пысăк хак пачĕç.