Крымсарайкка ялĕ 225 çул тултарнине халалласа уяв иртрĕ. Илемлĕ кĕвĕ ир-ирех уява йыхравларĕ. Ял çыннисем ял тăрăхĕн администрации çурчĕ умĕнчи лапама йышлăн пуçтарăнчĕç. Чи ватти, С. Дмитриев, 90 çулта, чи çамрăкки 6 уйăхра. Культура ĕçченĕсем «Крымсарайкка ялне – 225 çул» ятпа йĕркеленĕ стенд пурне те килĕшрĕ.

Уявра ăшă сăмахсем нумай пулчĕç. Раисăпа Виталий Ивановсемшĕн çак кун яланлăха асра юлĕ, мĕншĕн тесен вĕсем пĕр çемье чăмăртаннăранпа  45 çул çитнĕ,  5 ачана кун  çути парнеленĕ вĕсем. Çирĕп çемьене парнесем парса чысларĕç. Çавăн пекех Дангеевсен, Гордеевсен çемйисем хисепе тивĕçрĕç.

Вырăнти артистсем илемлĕ  юрăсем шăрантарчĕç, ташăпа ташларĕç.  Спорта юратакансем тĕрлĕ ăмăртусенче тупăшрĕç.