Акă, иртнĕ тăватă уйăхра 51 пепке кун çути курнă, вĕсенчен 28-шĕ арçын ачасем, ыттисем – пĕчĕк хĕр пĕрчисем. Хăш-пĕр çамрăк амăшĕсем ачисене мăшăрĕпе хут уйăрттармасăрах çуратаççĕ. Кăçал ун пек çемьесенче 10 ача çуралнă.

42 мăшăр пĕр-пĕрне ылтăн çĕрĕ тăхăнтартса пĕр çемьене чăмăртаннă. Çав вăхăтрах 15 çемье чăл-пар саланса кайнă. Çакăн çине çемье пуçĕ эрех-сăрапа иртĕхни, пурăнмалăх укçа-тенкĕ ĕçлесе илейменни тата ытти сăлтавсем те витĕм кÿнĕ.

Вилекенсен йышĕ районта çав-çавах пысăк шайра. Кăçалхи тăватă уйăхра 123 çын “леш тĕнчене” ăсаннă. Кам чирлесе, кам тĕрлĕрен инкек-синкеке пула ĕмĕрлĕхех куçне хупать. “Хаяр шĕвек” те хăйĕн тискер ĕçне тăвать.