Чăваш Сурăм ял тăрăхĕнчи Шор-Пайрашра хытарнă çул тăвасси вĕçленсе пырать. Чылайранпа кĕтнĕ çул яла “тĕнчепе” çыхăнтарнă ĕнтĕ, халĕ ял тăрăх тăсăлакан çул çинче юлашки ĕçсене пурнăçлаççĕ. Малтанхи çулсенче яла пырса кĕме майĕ те пулман, машинăсене кунта çитмесĕрех пĕр çухрăм аяккарахра лартса хăварса çуранах утма тивнĕ. Кĕçех Шор-Посайпа Шор-Пайраш ялĕсене уйăракан Ишнаваш юхан-шывĕ урлă кĕпер тума тытăнĕç. “Алиководорстрой” организаци ертÿçисем çĕнĕ кĕпере 2008 çулта хута яма шантараççĕ.