Элĕкри культурăпа кану центрĕнче халăх коллективĕ ятне илнĕ ушкăнсем темиçе те, ăна вĕсем кашни çулах çирĕплетме пыраççĕ. Сăмахран, «Валинке» халăх фольклор ансамбльнех илер. Вăл хăех виçĕ ушкăнран тăрать: пĕринче аслă ÿсĕмри çынсем,  иккĕмĕшĕнче – вăтам çулхисем, виççĕмĕшĕнче – ачасем. Тÿрех каламалла: çамрăксене чăваш халăх юрри-кĕввипе, йăли-йĕркипе, ташшипе кăсăклантарни пархатарлă.

1993 çулта йĕркеленĕ ансамбле. Элĕк ен ĕлĕкрен юрă-кĕвĕ юратнă. Авалхине манас мар, асаттесемпе асаннесен ырă йăли-йĕркине тытса пырас, сăна ламран-лама куçарас тесе чăмăртаннă та «Валинке» ушкăн. Çавна май центр ĕçченĕсем ялтан-яла çÿресе ватăсенчен пĕрчĕн-пĕрчĕн пухнă авалхи юрăсене. Çапла вара репертуар Сурăм, Тени, Кĕçĕн Тăван, Выла, Татмăш, Юнтапа тата ытти хăш-пĕр тăрăхри юрăсемпе пуянланнă.

- Паянхи кун та мĕн пуррипе лăпланмастпăр, халăх юррисене татах та пухса репертуара анлăлатасшăн, - тет ушкăн ертÿçи Л.Филиппова.

 «Валинкке» ансамбль районти мероприятисене çеç хутшăнмасть, тĕрлĕ çĕре çитет. «Раççей çăлкуçĕсем» фестивальте пĕр хутчен мар лауреат пулса тăнă. Регионсем хушшинчи «Культура пуян – Раççей пĕрре» çамрăксен 2-мĕш фестивалĕнче палăрнă. Кăçал Чулхула облаçĕнчи Богородск хулинче Пĕтĕм Раççейри фольклор ушкăнĕсен 5 фестивалĕнче II степенлĕ диплом тата хаклă парне çĕнсе илнĕ.

Сентябрьпе октябрь уйăхсенче Саратов облаçĕнчи Духовницк районĕн юбилейне тата Владимир облаçĕнчи Суздальте иртнĕ ярмăрккана хутшăнчĕç. Унтан та пушă алăпа таврăнмарĕç.