Аташсем кинора выляççĕ
Чăваш ен тĕп хулинче Шупашкарта Раççейри пĕчĕк халăхсемпе регионсен кинофестивалĕ вĕçленнĕ. Унта ытти картинăсемпе пĕрле «Вырма вăхăчĕ» («Время жатвы») кинофильм та кăтартнă. Ку лентăна çĕр-шыври паллă кинорежиссер Марина Разбежкина Чăваш енре чылай эпизодсене Элĕк районĕнче ÿкернĕ. Малтан кĕске метражлă фильм кăна кăларма палăртнă, республика правительстви укçа-тенкĕ чылай уйăрса панине тата вырăнти халăх нумай пулăшу кÿнине пула экрансем çине сулăмлă картина тухнă.
Фильмра тĕп геройсем тăваттăн, вĕсенчен иккĕшне режиссер пирĕн районта тупнă. Вĕсем икĕ Дима: Яковлев тата Ермаков. Пĕрремĕшĕ Элĕкрен, иккĕмĕшĕ Тури Выла ялĕнчен, пĕри Элĕк, тепри Ураскилт шкулĕсенче пĕлÿ пухаççĕ. Димăсем аташсем кăна мар, иккĕмĕш сыпăкри тăвансем те.