Чÿк уйăхĕнче регистраци тумалли ку чухнехи питĕ илемлĕ зал хăйĕн алăкĕсене уçрĕ. Район администрацийĕн ЗАГС пайĕ кашни мăшăрланакана уяври пек хаваслă лару-тăру туса пама тăрăшать. Раштавăн 12-мĕшĕнче, шăпах Раççей Конституцийĕн кунĕнче, ЗАГС пайĕн начальникĕ Мария Николаева 100-мĕш мăшăра саламласа чи ăшă та çепĕç сăмахсем каларĕ. Çав кун Эренарти Эдуард Николаевич Огандеровпа Вăрнар районĕнчи Услапа ялĕнчи Надежда Петровна Блинова хăйсен шăписене пĕр тĕвве пĕрлештерчĕç.

Юбилейлă мăшăра упăшкипе арăмĕн ашшĕ-амăшĕ ăшшăн саламларĕç, çамрăксем пурин умĕнче те тату пурнăçпа килĕштерсе пурăнма тупа турĕç. Палах, мăшăрлану кунĕнчи савăнăç  куççулĕ, пил сăмахĕсем, тăванĕсемпе тантăшĕсен хаваслă сăн-пичĕ, хитре чечексем нумайлăха асра юлĕç.

ЗАГС пайĕн начальникĕ М.Николаева çĕнĕ мăшăра мăшăрланнине çирĕплетекен свидетельство пачĕ, телейлĕ пурнăç сунчĕ.