Ял хуçалăхĕнче ĕçлекенсен тата продукци тирпейлекенсен кунне халалланă уяв вăхăтĕнче республикăран тата тĕрлĕ районтан килнĕ хăнасем Владимир Журавлев фермер хуçалăхне çитсе курчĕç. «Иккĕмĕш çăкăра» упрамалли хăтлă çурт-ангар чылайăшне тĕлĕнтерчĕ.

Унтан предприяти-организаци ертÿçисем, пысăк хăнасем «çавра сĕтел» хушшинче «Çĕр улма туса илес йывăрлăх тата малашлăх» темăна сÿтсе яврĕç. Мускав хулин апат-çимĕç ресурсĕсен департаменчĕн ертÿçин çумĕ Н.Корабейник Чăваш енрен пахча-çимĕç кăна мар, ытти ял хуçалăх продукчĕсем те туянма хатĕррине пĕлтерчĕ. Çак енĕпе кашни хуçалăхра суту-илĕпÿ вăй хуракан çын çирĕплетме сĕнчĕ. Унпа тÿрремĕн çыхăнса ĕçлени чылай ыйтăва çийĕнчех татса пама пулăшĕ.