«Хĕлхем» физкультурăпа спорт комплексĕнче кĕçнерни кун Элĕк район администрацийĕн пуçлăхĕн парнисене çĕнсе илессишĕн йăлана кĕнĕ вун тăваттăмĕш турнирĕ уçăлчĕ. Ку ăмăртăва республикăри тĕрлĕ районсенчи тата Тутарстанпа Мордовири 90 çамрăк боксер килсе çитнĕ.

Боксерсен турнирне район администрацийĕн пуçлăхĕн ĕçсене туса пыракан А.Куликов уçрĕ, ачасене ăнăçу тата çĕнтерÿ сунчĕ. Ун хыççăн Шупашкарти олимп резервсен училищин директорĕ, «Раççей Федерацийĕн физкультурăпа спортăн тава тивĕçлĕ ĕçченĕ» В.Семенов, ăмăртăвăн тĕп судйи, тĕнче, Европа, СССР тата Раççей чемпионĕ В.Львов тата ыттисем салам сăмахĕсем каларĕç.

Пĕрремĕш кунхине тĕрлĕ виçери вун тăватă мăшăр боксер рингра тупăшрĕç. Турнир виçĕ куна пырать. Паян финалти вăйăсем иртеççĕ.