Район администрацийĕн пуçлăхĕ Л.А.Читнаев, çур акине хатĕрленессипе ĕçсем епле пынипе паллашас тĕллевпе, кулленех хуçалăхсенче пулать. Вăл анчахрах В.Н.Узянов тата Г.М.Исаев ертсе пыракан хресчен-фермер хуçалăхĕсене çитсе курчĕ.

Ку хуçалăхсен тĕп çул-йĕрĕ – çĕр улми туса илесси. Хальхи вăхăтра вăрлăх суйлассипе ĕçлеççĕ. В.Узяновăн хуçалăхĕнче çĕр улми 105 гектар лартма палăртнă. Пахчаçимĕçсем 9 гектар, тĕш тырă культурисем 160 гектар йышăнмалла. Г.Исаев хуçалăхĕнче «иккĕмĕш çăкăра» 250 гектар çинче ÿстерме шутлаççĕ, çуртрисене 150 гектар акасшăн. Хресчен-фермер хуçалăхĕсем минераллă удобренисем, çунтармалли-сĕрмелли материалсем çителĕклех кÿрсе килнĕ.

Леонид Читнаев хуçалăхсен ертÿçисемпе, ял ĕçченĕсемпе тĕл пулса калаçнă, ĕçе епле йĕркеленипе, ĕç укçи тÿлесси мĕнле пынипе паллашнă. Çĕр улми хранилищисене пăхса çÿренĕ, вырăнсенчи ĕç-хĕлпе кăмăллă пулнă.