Элĕк районĕнчи «Звезда» ял хуçалăх предприятине Валерий Константинов ертсе пыма тытăннăранпа шăпах çулталăк çитрĕ. Çак тапхăрта пулса иртнĕ улшăнусемпе кăсăкланса çула тухрăм.

Валерий Владимировича машинăпа трактор паркĕнче тĕл пултăм. Техникăна çур акиччен тĕрĕслев витĕр кăларма хатĕрлетчĕç. Палăртма кăмăллă: парк çĕнĕ техникăпа пуянланнă, хĕрÿ тапхăр пуçланиччен киввине те юсаса çĕнетнĕ.

Иртнĕ çул «МТЗ-82» çĕнĕ трактор, прессподборщик тата «Дон» комбайн туяннă. Председатель кăçал та техника паркне пуянлатма 6 миллион ытла тенкĕ тăкаклама палăртнине пĕлтерчĕ. «Çĕнĕ тракторсем, машинăсемпе агрегатсем ĕç тухăçăлăхне кăна мар, пахалăхне те ÿстерме витĕм кÿрĕç», - терĕ вăл кăмăллăн. Çак ĕçсене пурнăçлама «АПК» наци проекчĕн витĕмĕпе усă кураççĕ. Çăмăллăх кредитне Раççей ял хуçалăх банкĕ уйăрнă. Çур аки пуçланиччен техника килсе çитмелле.

Хуçалăхăн сухаласа акмалли çĕр лаптăкĕ пин гектар ытла. Кĕрхи культурăсене 306 гектар акса хăварнă, 552 гектар кĕрхи çĕртме тунă. Вĕсене апатлантарма 50 тонна минерал удобренийĕ туяннă. Çурхисене 400 гектар ытла акма палăртнă, çĕр улми лаптăкĕ 40 гектар йышăнĕ. Хуçалăхра паха вăрлăх хатĕрлессипе тĕллевлĕ ĕçленĕ, кондициллине кăна акĕç. Нумай çул ÿсекен курăк вăрлăхне те çĕнетеççĕ. Сăмахран, 200 килограма яхăн супер-элита люцерна вăрлăхĕ туяннă. Çурхи ака-суха ĕçĕсене пурнăçлама сĕрмелли- çунтармалли материал та çителĕклĕ.

Пĕлтĕрхи çанталăк пăтăрмахĕсем ял хуçалăхĕнче продукции илес тата выльăх апачĕ хатерлес  тĕлĕшпе йывăрлăх нумай кăларса тăратнă пулин те хуçалăхра выльăх йышне ÿстерме пултарнă. Халĕ Кунта 293 мăйракаллă шултра выльăх, сăвакан 118 ĕне. Ку 2010 çулхипе танлаштарсан  30 пуç ытларах. Кăçалхи виçĕ уйăхра сăвăм иртнĕ çулхинчен 45,9 процент ÿснĕ. Хуçалăхри чылай ыйтăва татса пама сĕт укçи самаях пулăшать. Сăвакан ĕнесене йышне татах ÿстерме палăртнă. Шел те, сĕт хакĕ чакни шухăшлаттарать.

«Звезда» ял хуçалăх пĕрлешĕвенче 47 çын вăй хурать. Вĕсен пурин те пĕр ĕмĕт – тĕллев: умри йывăрлăхсене çĕнтерсе маллала талпăнасси, палăртнă тĕллевсене пурнăçласси. Валерий Константинов пултаруллă ертсе пынипе ÿсĕм курăмлă пуласси иккĕлентермест.