Элĕкри культурăпа кану центрĕнчи «Орлята» патриотла клуб (ертÿçи А.Судман) членĕсем космоса тĕпчес ĕçе халалланă районти çынсене тупса палăртассипе шырав ĕçĕсем ирттерчĕç. Ку пархатарлă ĕç ахальлĕнех пулмарĕ: Элĕк Енре пурнăçне космонавтикăпа çыхăнтарнă çын пурри курăнчĕ. Ку – Петр Григорьевич Григорьев.

Клуб членĕсем П.Григорьевпа тĕл пулу йĕркелерĕç. Çавна май аллине пĕлĕте «перĕнтернĕ» çын çинчен интереслине нумай пĕлчĕç. Петр Григорьевич пĕрремĕш космонавтпа Ю.Гагаринпа, чăваш «ăмăрт кайăкĕпе» А.Николаевпа, пĕрремĕш хĕрарăм-космонавтпа В.Терешковăпа тата ытти ĕçтешĕсемпе тĕл пулни çинчен хаваспах каласа пачĕ.