Район администрацийĕн административлă комиссийĕ кăçалхи çур çулхи ĕçсене пĕтĕмлетнĕ.

Комисси ларăвĕнче право йĕркине административлă майпа пăснă 123 ĕç пăхса тухнă. Пурте вĕсем Чăваш Республикин «Хуласемпе поселоксенче тата ялсенче тирпей-илем кĕртмелли правилăсене пăсни» саккуна пăхăнманнипе çыхăннă. Çавăншăн 38 гражданина пĕтĕмпе 6 пин те 200 тенкĕлĕх штраф панă, 2 пин те 300 тенкине шыраса илнĕ, 85 çынна асăрхаттарса хăварнă.

Паллах, административлă комиссин тĕллевĕ – айăпа кĕнисене çирĕп явап тыттарасси мар, саккун йĕркисене тĕрĕс пăхăнса пурăнасси çинчен асăрхаттарса тăрасси. Тасалăхпа тирпей-илем хамăршăнах мар-и-ха;

Ялсемпе урамсем, район центрĕ яланах таса та илемлĕ пулни сывлăхшăн усăллă вĕт-ха, санитарипе гигиена, экологи лайăхланса пырать. Çакна асра тытар: район вăл – пирĕн пĕрлехи çурт, ăна йĕркеллĕ тытса тăрассишĕн пурте пĕрле тăрăшар.