«Звезда» ял хуçалăх производство кооперативĕн ĕçченĕсем вырма ĕçĕсене кĕске вăхăтра, пысăк пахалăхпа ирттерме ĕмĕтленеççĕ. Çакна валли майсем те çук мар. Анчахрах, акă, кунти машина-трактор паркĕ ПАЛЕССЕ GS 812 йышши вĕр çĕнĕ комбайнпа пуянланнă. Хакĕ самаях пысăк унăн, 3 миллион та 700 пин тенкĕ тăрать. Çавăнпа «уй-хир карапне» кредит шучĕпе илнĕ. Хуçалăх машина-трактор паркне çĕнетме тĕрлĕрен çăл куçсемпе усă курать. Кассăра укçа пулсан çийĕнчех тÿлесе татăлаççĕ, çук-тăк лизингпа тата кредитпа усă кураççĕ. Кăçал кăна юнтапасем 11 миллиона яхăнлăх техника туяннă. Ку шутра – «Беларуç-892» тата «ХТЗ-17221» тракторсем, груз турттармалли КамАЗ-43143 автомашина.