Çапла пĕтĕмлетрĕм Элĕк районĕнчи «Алмаз» ТЯО предприяти ĕç-хĕлĕпе паллашсан. Маларах йывăрлăха лекнĕскер юлашки çулсенче ÿсĕм çулĕ çине тăнă. Хальхи вăхăтра ăнăçлă аталанакан хуçалăхсен шутĕнче. Геннадий Денисов ертÿçĕ тилхепине алла илнĕренпе вăхăт нумаях иртмен пулин те предприяти ÿсĕмĕ - куç умĕнче. Çаврăнăçуллă, вăхăт таппине туйса ĕçлекен председатель йывăрлăхсене парăнтарса малалла талпăнмалли çул-йĕре палăртма пултарнă. Чи малтанах коллективри яваплăха ÿстернĕ, ĕçшĕн хавхалантарнă.

Геннадий Васильевичпа районта çур аки умĕн ирттернĕ семинар-канашлура паллашрăм. Вăл «Алмаз» ТЯО территорийĕнче иртрĕ. Унта пухăннисем машина-трактор паркне çитсе курчĕç. Техника паркĕнчи йĕркелĕх савăнтарчĕ.

Черетлĕ тĕл пулу вырма тапхăрĕнче иртрĕ. Район администрацийĕн пуçлăхĕ Леонид Читнаев тата ял хуçалăх пайĕн ертÿçи Анатолий Прохоров вырма ĕçĕпе паллашма хуçалăхсене çитсе курма сĕнчĕç - килĕшрĕм. Чи малтан «Алмаз» ТЯО территорине çитрĕмĕр. Туллăн таса пусси кăмăла çĕклерĕ. «Лайăх пуçтарса илсен тухăç самаях пулĕ», - терĕ Леонид Читнаев.

Кĕçех пирĕн пата хир карапĕ çывхарчĕ. Акă «Агросс-530» комбайн бункерти тырра автомашина кузовне пушатрĕ.

- Вырмана икĕ комбайн хутшăнать. «Дон-1500» маркăллине 2007 çулта туянтăмăр, - терĕ Геннадий Васильевич.

Хуçалăх виçĕ яла пĕрлештерет. Сухаламалли-акмалли çĕр 920 га. Çĕр пайĕсен хуçисемпе килĕшÿ тăвас ĕç пырать. Тырă вырма тĕплĕн хатĕрленнĕ. Пĕтĕмпе 600 га çинчен пухса кĕртмелле. Геннадий Васильевич ертÿçĕ кăна мар, агроном та. Малтан инженер пулнă. Халĕ çак ĕçе ывăлĕ Денис пурнăçлать. Кăçал вăл институт пĕтернĕ. «Ывăлĕ ашшĕ пекех маттур», - теççĕ механизаторсем. Сăмах май, машина-трактор паркĕнче ытларахăшĕ - çамрăксем.

Чи кирли - ĕçлекене вăй хума май туса парасси. Паркра тăрăшакансене ятарлă тумтирпе тивĕçтернĕ. Юлашки çулсенче техника паркĕ самай çĕнелнĕ. Кăçал кăна 8,6 миллион тенкĕлĕх çĕнĕ техника туяннă.

- Кĕрхи тулă 185 га йышăнать. Çуркунне «Казанский-560» элита вăрлăх акни ырă çимĕç парать, - тет Геннадий Васильевич. Тĕллев – ăнса пулнă тыр-пула вăхăтра тата çухатусăр пухса кĕртесси. Сĕрмелли-çунтармалли материалсене хĕл кунĕсенче хатĕрлеме тăрăшрăмăр. Йĕтем çинче ĕçе икĕ сменăпа йĕркелерĕмĕр. Механизаторсене кунне икĕ хутчен вĕри апат çитеретпĕр. Выльăх-чĕрлĕх отрасльне те тивĕçлĕ шайра аталантарма тăрăшатпăр. Иртнĕ çул 12 пуç ăратлă пушмак пăру туянтăмăр. Выльăх йышне ÿстерме йышăнтăмăр. Тин çеç сунă сĕте сивĕтме ятарлă оборудовани те туянтăмăр.

Техника паркне çĕнетме Вăрнарти сĕт завочĕ пулăшнине палăртрĕ ертÿçĕ. «Алмаз» ТЯО пахалăхлă сĕте унта леçет.

Г.Денисов коллективра кашни тăрăшса ĕçленине, пĕр-пĕрне пулăшса пынине палăртрĕ. Выльăх-чĕрлĕх патĕнче Лидия Сергеева, Лия Антонова тата Раиса Спиридонова ырă тĕслĕх кăтартнине пĕлтерчĕ.

«Алмаз» хăйĕн умĕнчи тĕллевсене пурнăçлассишĕн тăрăшать. Утăм хыççăн утăм тăвать. Кунта аякран килсе пулăшасса кĕтсе лармаççĕ, кашни хăйне шанать. Геннадий Денисов хуçалăх тилхепине çирĕп тытать. Ертÿçĕ тупăшлă ĕçлесе аталанмалли майсене шырать, çĕнĕлĕхсене пурнăçа кĕртет. Ашшĕ çулĕпе пыракан ывăлĕ Денис та ун пекех тăрăшуллă. Вăй хурсан ÿсĕм пулатех.