Пĕчĕк тата вăтам бизнес районти экономикăна аталантарма, тавар çаврăнăшне ÿстерме, хушма ĕç вырăнĕсем йĕркелеме майсем туса парать.2011 çулхи çур çулта пĕчĕк бизнесра 997 çын ĕçлени паллă. Кăçал Элĕкри бизнес-инкубатор комплексне тума республика бюджетĕнчен 27184,8 пин тенкĕ уйăрнă.

Çурта реконструкциленĕ хыççăн унăн пĕтĕмĕшле лаптăкĕ 1344,89 тăваткал метрпа танлашĕ, 35 офис пÿлĕмĕ пулĕ, конференц-зал вырнаçĕ. Асăннă объекта 1994 çулта тума пуçланă, анчах та укçа-тенкĕ çитменрен ĕç чарăнса ларнă. Хальхи ертÿçĕсем строительство çине пысăк тимлĕх уйăрма шутланă. Çĕнĕ çурт пĕчĕк предпринимательство ĕçне аталантармалли центр пулĕ. Çавăн пекех Элĕк сăн-сăпатне те улăштарĕ. Тĕп ĕçсене 2011-2012 çулсенче туса ирттерме палăртнă. Проектпа смета ĕçĕсене пурнăçлама 38,3 миллион тенкĕ кайĕ.

Паянхи куна Элĕк район администрацийĕ бизнес-инкубатор çуртне туса пĕтерес тĕллевпе электронлă майпа уçă аукцион ирттерет, строительство ĕçĕсене пурнăçлама подряд организацине палăртать. Бизнес-инкубатора хута ярассин тĕп тĕллевĕ – пĕчĕк предпринимательствăна аталантарма майсем туса парасси, ку ĕçе çамрăксене явăçтарасси. Асăннă çуртра ĕçе мĕнле йĕркелемеллине те вĕрентĕç.