Элĕкри культурăпа кану центрĕнче Чăваш Енри культура пулăмĕсен марафонĕ савăнăçлă лару-тăрура уçăлчĕ.Ăна уçма район администрацийĕн пуçлăхĕ Л.Читнаев, республикăри культура программисен дирекцийĕн директорĕ М.Матросов, Муркашри чăх-чĕп фабрикин генеральнăй директорĕ Н.Ванеркин хутшăнчĕç.

Район администрацийĕн пуçлăхĕ Леонид Читнаев районта культура марафонне йĕркелени пысăк пĕлтерĕшлине палăртрĕ. Вăл халăха илемлĕхпе паллашма тата харпăр культурине лайăхлатма паха майсем туса парать. Республикăри культура программисен дирекцийĕн ертÿçи Максим Матросов марафона уçнă май райадминистраци пуçлăхне Л.Читнаева «Чăваш Республикинчи 2011 çулхи культура территорийĕ» конкурс çĕнтерÿçин дипломне тата музей валли района йĕркелени çинчен калакан архив докуменчĕсен копийĕсене пачĕ. Муркашри чăх-чĕп фабрикин директорĕ Николай Ванеркин марафон республикăри пултарулăх ăстисемпе паллашма лайăх майсем туса панине палăртрĕ.

Культура пулăмĕсен марафонĕ «Çуралнă кун ячĕпе, тăван район» театрализациленĕ кăтартупа уçăлчĕ. Кунтах хамăр районта пурăнакан, ялта тăрăшса ĕçлекен çамрăксене чысларĕç.

Савăнăçлă уявра Чăваш патшалăх академи симфони капелли концерт кăтартрĕ.