Элĕкри культурăпа кану центрĕнчи «Валинке» халăх фольклор ушкăнĕ Красноярск тăрăхне тухса кайни пирки пĕлтернĕччĕ. Нумаях пулмасть элĕксем тăван кĕтесе таврăннă. Инçе çула мĕнле кайса килни пирки Элĕкри культурăпа кану центрĕн директорĕ Л.Андреева каласа пама кăмăл турĕ.

– Красноярск тăрăхĕнчи чăваш наципе культура автономийĕн председателĕ Геннадий Храмов «Чÿклеме» уявне хутшăнма чĕннĕрен «Валинке» ушкăн октябрĕн 4-мĕшĕнче çула тухрĕ, – терĕ вăл. – Красноярск чăвашĕсем пире ăшă кăмăлпа кĕтсе илчĕç. Ку тăрăхри шалти ĕçсен министерствин профилакторине вырнаçтарчĕç. Пĕрремĕш кунхине, октябрĕн 7-мĕшĕнче, Красноярск хулинчи чăваш диаспорин художество пултарулăх ертÿçипе тĕл пулу йĕркелерĕç, ташă ташлассипе тата юрă юрлассипе мастер-класс иртрĕ. Тепĕр кунхине Назарово хулине «Чÿклеме» чăваш уявне тухса кайрăмăр. Уяв кăнтăрла пуçланчĕ. Салам сăмахĕсем хыççăн Раççей тата Чăваш Ен гимнĕсем янрарĕç. Концерт программине 18 чăваш коллективĕ, 4 вырăспа Украина тата казаксен ансамблĕсем хутшăнчĕç. «Валинке» халăх ансамблĕ сцена çине тухмассерен тăвăллăн алă çупни илтĕнчĕ. Уявра Элĕк районĕнчен тухнă çынсемпе те курнăçма тÿр килчĕ. Октябрĕн 9-мĕшĕнче вара Красноярск ГЭСне кăтартрĕç, паллă вырăнсем тăрăх экскурси илсе çÿрерĕç.

Л.Андреева каланă тăрăх, Красноярскран каялла таврăннă чухне элĕксем Тюмень тата Екатеринбург хулисенчи чăвашсем умĕнче концерт кăтартнă. Тĕл пулусенче аякри чăвашсем тăван чĕлхешĕн тунсăхлани сисĕннĕ. Элĕксем Красноярск тăрăхĕнчи чăвашсен халăх юррисене пĕрле илсе килнĕ. Фольклор ушкăнĕ Чăваш наци конгресне инçе çула кайса килме пулăшнăшăн тав тăвать.