Элĕкри тĕп вулавăшра нихăçан та тунсăхлама вăхăт çук. Кĕр кунĕсем ăшă та канлĕ пулччăр тесе библиотека ĕçченĕсем вулав залĕнче Ватăсен шкулне çÿрекенсем валли кĕрхи бал ирттерчĕç.

З.Удяковăпа А.Егорова библиотекарьсем уява питех те савăнăçлă ертсе пычĕç, сăвăсем вуларĕç, малашне те пĕрле пулма йыхравларĕç. Уява хутшăннисен пултарулăхне хаклама ятарлă жюри йĕркелерĕç. Бал хăнисем тĕрлĕ конкурссене: «Эсир балра пулатăр-и;», «Чечексен аукционĕ», «Хаваслă фантсем» тупăшусене хутшăнчĕç. Чи пултаруллисем асăнмалăх призсемпе парнесене тивĕçрĕç. Надежда Иванова «Бал королеви» пулса тăчĕ, Анатолий Тимофеев – «Кĕр королĕ».

«Кĕрхи ылтăн кунсем», «Улма-çырлапа пахча-çимĕç – тĕлĕнмелле çимĕçсем» куравра альбомсем, картинăсен репродукцийĕсем пулчĕç, кĕрхи апат-çимĕç хатĕрлемелли рецептсемпе паллашма май килчĕ.