Кĕçнерни кун райадминистрацин актсен залĕнче район депутачĕсен Пухăвĕн черетлĕ ларăвĕ пулчĕ.

Ăна район пуçлăхĕ – депутатсен Пухăвĕн председателĕ В. Дубинин уçрĕ. Вăл район администрацийĕн пуçлăхне суйлассипе йĕркеленĕ конкурс комиссийĕн председательне, Чăваш Республикин Патшалăх канашĕн депутатне Н. Ванеркина сăмах пачĕ. Николай Григорьевич конкурс пĕтĕмлетĕвĕпе паллаштарчĕ.

- Район администрацийĕн пуçлăхĕн тивĕçĕсене пурнăçлама кăмăл туса 5 çын документсем тăратрĕç, - терĕ вăл. - Анчах та Александр Ефремов хăйĕн кандидатурине каялла илчĕ.

Комисси председателĕ Н. Ванеркин кандидатсем пурте тулли документсем хатĕрленине, кашниех района аталантарассипе татăклă программăсем хатĕрленине пĕлтерчĕ.

- Конкурс комиссийĕ Александр Куликов кандидатăн проектне суйласа илчĕ, вăл çĕнтерÿçĕ пулнине палăртрĕ, - çирĕплетрĕ Николай Григорьевич.

Депутатсем конкурс комиссийĕн йышăнăвĕпе килĕшсе сасăларĕç. Кун хыççăн депутатсем «Район администрацийĕн пуçлăхне контрактпа çирĕплетесси çинчен» ыйтăва пăхса тухрĕç, район пуçлăхĕ - депутатсен Пухăвĕн председателĕ В. Дубинин тата район администрацийĕн пуçлăхĕ А. Куликов контракт çине алă пусрĕç.

- Мана район администрацийĕн пуçлăхĕ пулма шаннăшăн пурне те чĕререн тав тăватăп, эпĕ кашнинпе пĕр чĕлхе тупса ĕçлеме хатĕр. Района аталантарассишĕн вăй-хала шеллемĕп,- терĕ хăйĕн сăмахĕнче Александр Николаевич.

ЧР Пуçлăхĕн Администрацийĕн ертÿçин çумĕ М.Архипов район администрацийĕн çĕнĕ пуçлăхне ăнăçу сунчĕ.