Анчахрах Сергиев Посад хулинче Центрти федераци округĕн кунг-фу енĕпе чемпионат иртнĕ. Мĕнле ăмăрту тетĕр-и; Десантниксен пĕрлешĕвĕн призне çĕнсе илессишĕн йĕркеленĕ ăна.

Çак ăмăртура пирĕн ентеш – Элĕкре çуралса ÿснĕ Эдуард Васильев та хутшăннă. Чемпионатра вăл пурне те тĕлĕнтернĕ. 75 килограмлă виçере пирĕн ентеш пĕрремĕш тытăçурах хăйне хирĕç тухнă çынна нокаута ярать. Иккĕмĕш тупăшура очкосем пухса чи мала тухать те финала çитет. Акă вăл – кĕтнĕ çĕнтерÿ: бокс меслечĕсемпе питĕ хăвăрт кĕрешсе Элĕк йĕкĕчĕ хăйĕн тантăшне 4 çеккунтрах «тустарса» тăкать.

Çивĕч тупăшура пĕрремĕш вырăна тухса Эдуард чемпион пулса тăрать, центрти федераци округĕн кубокне çĕнсе илет.

Элĕк йĕкĕчĕ кăçалхи çу уйăхĕнче кунг-фу енĕпе Раççей чемпионатне хутшăнасшăн.