Элĕк районĕнче бокс пĕлтерĕшлĕ вырăнта. Ачасем спорт енне туртăнни чăннипех те савăнтарать.

Районта боксерсен пĕрремĕш утăмĕсене 1978 çулпа çыхăнтармалла. 1980 çулта Сашăпа Юрий Викторовсем тата В. Гордеев Пĕтĕм Раççейри ял вăййисене хутшăнма ирĕк илнĕ.Çакăн хыççăн бокс енне туртăнакансем нумайланнă. Пытармалли çук, вăл вăхăтра тренировкăсем ирттерме ятарлă зал пулман.

Элĕкре боксерсен официаллă ăмăртăвĕ 1983 çулта иртнĕ. Ăна Совет Союзĕн Геройне И. Ефимова халалланă. Унта 62 спортсмен хутшăннă. 1985-87-мĕш çулсенче «Урожай» обществин турнирĕсем иртнĕ. Элĕк команди виçĕ çул мала тухнă.

1998 çултан пуçласа Элĕкре район администрацийĕн пуçлăхĕн парнисене çĕнсе илессишĕн боксерсен турнирĕ иртет. Элĕк боксерĕсем тĕрлĕ ăмăртусенче пĕрре мар малти вырăнсене çĕнсе илнĕ. Раççейре те, республикăра та палăрнă вĕсем. О. Павлова, В. Матвеева, Бориспа Максим Максимовсене, Александрпа Юрий Викторовсене, С. Моисеева, С. Максимова, Н. Михайлова, В. Григорьева ырăпа асăнмалла. Вĕсемпе эпир чăннипех те мухтанма тивĕç.

Мартăн 22-24-мĕшĕсенче Элĕк район администрацийĕн пуçлăхĕн парнисене çĕнсе илессишĕн йăлана кĕнĕ турнирĕ Элĕкри «Хĕлхем» физкультурăпа спорт комплексĕнче иртет. Турнира пурне те пырса курма чĕнетпĕр.