Шупашкарти Трактор историйĕн музейĕнче «XXI ĕмĕр Кулибинĕ» конкурс иртнĕ. Ăна Раççейĕн машина тăвакансен пĕрлĕхĕ, «Трактор тăвакансем» концерн йĕркеленĕ, Машина тăвакан кунне халалланă.

Куравра кăтартма 24 машина тăратнă. Пĕри - Владимир хулинчен, ытти - республикăран. Техника хатĕрĕсене ял хуçалăх техникине лайăх пĕлекен специалистсем, çав шутра концерн президенчĕ Михаил Болотин, РФ Патшалăх Думин депутачĕ Владимир Гутенев, «МИКОНТ» компани конструкторĕсем, пахаланă.

Конкурс икĕ номинаципе иртнĕ. Пĕрремĕшĕнче - тракторсем, иккĕмĕшĕнче кăкармалли агрегатсем кăтартнă. Маçтăрсене вăл е ку машинăна кирек хăш двигательпе, трансмиссипе ăсталама ирĕк панă.

Конкурсра палăрнисене уявра чысланă. Концернăн ятарлă парнине - 30 пин тенке - Валерий Терентьев /Элĕк районĕнчи Сурăмпуç Мучикасси ялĕ/ тивĕçнĕ. Трактор пуçтарнисенчен пĕрремĕш премие - Дмитрий Александров /Шупашкар районĕнчи Иккасси ялĕ/, иккĕмĕшне - Алексей Чернов /Елчĕк районĕнчи Аслă Елчĕк ялĕ/, виççĕмĕшне Александр Кузьмин /Канаш районĕнчи Янкăлч ялĕ/ çĕнсе илнĕ. Виктор Полытов /Шупашкар хули/, Николай Матвеев /Çĕмĕрле районĕнчи Юманай ялĕ/, Рюрик Николаев /Вăрнар поселокĕ/ çаклатса ĕçлемелли чи паха агрегатсем илсе килнĕ. Вĕсене те преми парса хавхалантарнă.