Авăн уйăхĕн 8-мĕшĕнче Чăваш Ен Пуçлăхĕ Михаил Игнатьев «Раççей - спорт çĕр-шывĕ» форума ирттерессипе черетлĕ ларăва пухнă. Физкультурăпа спорт министрĕ Сергей Мельников пĕлтернĕ тăрăх, Чăваш Енре форумра 250 çынран тăракан делегат пулмалла. Спортăн сакăр тĕсĕпе мастер-классем ирттерме тĕллев лартнă. Унта пурĕ 400 ытла специалист хутшăнĕ.

Юпа уйăхĕн 9-мĕшĕнче Пĕтĕм тĕнчери хăвăрт утакансен кунĕ иртнине Шупашкар хула администрацийĕн пуçлăхĕ Алексей Ладыков пĕлтернĕ. Унта 10 пин ытла çын хутшăнĕ. Чăваш Енĕн спорт министрĕ Сергей Мельников палăртнă тăрăх, Раççей Федерацийĕнче Пĕтĕм тĕнчери хăвăрт утакансен кунĕ пĕрремĕш хут иртет. Чăваш Ен Пуçлăхĕ халăха спорта явăçтарма тата тĕрлĕ организацисенче ĕçлекенсене ирхи зарядкăна тухма чĕнсе каланă.

Авăн уйăхĕн 6-мĕшĕнче Шупашкарта хăвăрт утассипе Раççей Кубокне çĕнсе илессишĕн ăмăрту иртрĕ. Унта пурĕ 13 регионти 137 спортсмен хутшăнчĕ, вĕсен шутĕнче спорт мастерĕсем те тупăшрĕç. Ку йышра Элĕкри «Хĕлхем» ача-пăчапа çамрăксен спорт шкулне çÿрекенсем те пулчĕç. Хĕрсенчен 5000 м утса Анастасия Дубининапа Анна Степанова палăрчĕç, 1 разряд илме пултарчĕç. Ирина Свистковăпа Нелли Львова - 2 тата 3 разрядсем. Çамрăк спортсменсем ăмăртуран хавхаланупа таврăнчĕç.

Аса илтеретпĕр, юпа уйăхĕн 9-11-мĕшĕсенче, Шупашкарта «Раççей - спорт çĕр-шывĕ» форум иртет. Унта 3 пине яхăн çын хутшăнать.