Çĕнĕ çул умĕн вăрман илемне - ешĕл чăрăша кашни çулах инкек кĕтет. Çак тапхăрта тин çеç вăй илме пуçланă çĕршер çамрăк чăрăш сая каять. Чăрăшсене каснăшăн РФ Административлă майпа саккуна пăсни çинчен калакан кодексăн 8.28 статйин 1-мĕш пайĕпе килĕшÿллĕн граждансене административлă майпа айăплаççĕ. Вĕсен 3-4 пин штраф тÿлемелле пулать, должноçри çынсен - 20-40 пин, юридици сăпатлĕ çынсен - 200 - 300 пин. Енчен те чăрăша каснă чухне мĕнле те пулин техникăпа е хатĕрпе усă курнă пулсан штраф виçи ÿсет, тата вăл е ку хатĕре туртса илеççĕ.

Саккунпа килĕшÿллĕн лăсăллă йывăçсен (хыр, чăрăш, пихта) диаметрĕ 12 сантиметртан кая пулсан, вĕсене касакансен штраф виçи 50 хут ÿсет. Енчен те хыр-чăрăша декабрь-январь уйăхĕсенче касаççĕ пулсан тăкак тата тепĕр икĕ хут ÿсет. Тĕслĕхрен, пĕр чăрăша саккунсăр майпа каснă браконьерăн 2486 тенкĕ тÿлеме тивет тата 3-4 пин тенкĕ административлă штраф кĕтет. Енчен те тăкак 5 пинрен иртнĕ пулсан саккуна пăсакан тĕлĕшпе уголовлă ĕç пуçараççĕ. Ăна пысăк штраф тÿлеттереççĕ е 6 çуллăха ирĕкрен хăтараççĕ.

Вăрман хуралçисемпе полици уйрăмĕн сотрудникĕсем çулсеренех мобильлĕ ушкăнсем йĕркелесе Сурăм лесничестви хатĕрленĕ графикпа рейдсене тухаççĕ.

Олег АФАНАСЬЕВ,

Сурăм лесничествин участокри мастерĕ.