Нарăсăн 1-мĕшĕнче район администрацийĕнче наркотика хирĕç кĕрешекен комиссин кăçалхи 1-мĕш ларăвĕ иртрĕ. Ăна комисси председателĕ - район администрацийĕн пуçлăхĕ Александр Куликов ертсе пычĕ.

Ларура Элĕкри полици уйрăмĕн начальникĕ Андрей Константинов 2015 çулта район территорийĕнче наркотик саракансен çулне пÿлес тĕлĕшпе туса ирттернĕ ĕçсем çинчен каласа пачĕ. Андрей Егорович пĕлтернĕ тăрăх, районта наркотик хатĕрĕсемпе тата психотроплă япаласемпе саккуна хирĕçле усă курассине профилактикăлас ыйтусемпе тăтăшах рейдсем, операцисем иртеççĕ. «Мăкăнь-2015» операци вăхăтĕнче, тĕслĕхрен, наркопреступленисемпе тата наркоманипе кĕрешессин тухăçлăхне ÿстерес тĕлĕшпе час-часах халăхпа тĕл пулса калаçнă, уйрăмах ку таранччен саккуна пăснисем çине пысăк тимлĕх уйăрнă, хуласенчен пирĕн тăрăха килсе наркотиклă ÿсен-тăран пуçтаракансене сăнанă. 2015 çулта право хуралĕн органĕсем районта наркотиксемпе çыхăннă преступленисем тупса палăртман, районта наркомани чирĕпе аптракансем çук.

Район администрацийĕн вĕренÿ пайĕн специалист-эксперчĕ Наталия Николаева пĕлтернĕ тăрăх, «йывăр» ушкăна кĕрекен ачасене вĕренÿ учрежденийĕсенче кружоксемпе секцисене явăçтарма тăрăшаççĕ.

Элĕк район хаçачĕ те ку çивĕч ыйтăва куçран вĕçертмест. Пĕлтĕр кăна «Наркотиксене сарассине тата усă курассине хирĕç кĕрешесси» темăпа 12 материал кун çути курнă. Çавăн пекех сывă пурнăç йĕркине явăçтарас ыйтусемпе тăтăшах материалсем пичетленеççĕ.

Ларăва РФ Наркотĕрĕслев службин Чăваш Енри управленийĕн оперативлă службăн 3-мĕш уйрăмĕн начальникĕ Алексей Сустайкин хутшăнчĕ. Алексей Евгеньевич кĕскен республикăри лару-тăрупа паллаштарчĕ, Элĕксене наркотиксемпе кĕрешессин тухăçлăхне ÿстерме сĕнÿсем пачĕ.

«Наркомани» диагноз лартнă çынсем çинчен пĕрре кăна мар илтнĕ эпир. Вĕсене сывалма пурнăç çулĕ çине çирĕппĕн тăма вăхăт та, вăй та нумай кирлине пурте аванах пĕлетпĕр. Кун пек инкек авăрне лекнисем валли ятарласа реабилитаци центрĕсем йĕркелеççĕ. Шăпах çакăн йышши центр пирĕн районти Мартынкасси ялĕ çывăхĕнче вырнаçнă. Февралĕн 3-мĕшĕнче центрта РФ Наркотĕрĕслев службин Чăваш Енри управленийĕн пуçлăхĕ Евгений Барсуков, этем прависене хÿтĕлекен Чăваш Енри уполномоченнăй Юрий Кручинин, тĕп врач-нарколог Ирина Булыгина тата Наркотĕрĕслев управленийĕн тата Уполномоченнăй аппарачĕн сотрудникĕсем пулчĕç, кунти ĕç-хĕл-пе паллашрĕç. «Свобода» центр наркоманипе чирлекенсене тулли енлĕн пулăшу парать. Паянхи кун кунта социаллă реабилитаци пулăшăвне 6 çын илет. Вĕсем Пушкăртпа Тутар республикисенчен, Мускав облаçĕнчен. Центрта «12 утăм» программăпа усă кураççĕ: арт-терапи, ĕç терапийĕ. Реабилитаци витĕр тухакансем хăйсен пурнăçĕ çине çĕнĕлле пăхасса шанаççĕ. Вĕсем программа вĕçленсен кунтах юлса ыттисене инкекрен тухма пулăшма пултараççĕ.

Ĕçлĕ çул çÿревре «Свобода» организаци ĕçне малалла та тăсма ирĕк панă.

Марина ЛЕОНТЬЕВА.