Февралĕн 5-мĕшĕнче «Чăваш Ен» ПТРК ушкăнĕ пирĕн район çинчен сюжет ÿкерме килнĕ. Егор Алексеев корреспондентпа Александр Яковлев оператор Янăш çывăхĕнчи çул-йĕре мĕнле пăхса тăнипе паллашнă. Унтан Ураскилт шкулĕнче пулса курнă. Тепĕр сюжета ачасене патриотизмла воспитани парассине халалланă. Пултарулăх ушкăнĕ Ураскилт шкулĕнче ЧР çар ĕç комиссариачĕн Муркаш тата Элĕк районĕсен уйрăмĕн начальникĕ Владимир Казаковпа «Раççей Союзĕн Афганистан ветеранĕсем» районти уйрăмĕн председателĕ Валерий Иванов, Чечен вăрçине хутшăннă Олег Данилов ирттернĕ паттăрлăх урокĕнче пулнă. Хăнасем ачасене çар пурнăçĕ çинчен каласа панă. Шкул директорĕ Владислав Миронов тата физкультура вĕрентекенĕ Сергей Филиппов спортпа массăллă мероприятисем çинче чарăнса тăнă.