Февралĕн 13-мĕшĕнче «Хĕлхем» спорт шкулĕнче оборонăпа массăллă тата спорт ĕçĕсен уйăхлăхĕнче районти организацисемпе предприятисенчи, ял тăрăхĕсенчи арçынсен командисем хушшинче йăлана кĕнĕ тăрăх волейбол выляссипе ăмăрту иртрĕ. Унта Ехремкасси, Йăлкăш, Чăваш Сурăм, Тавăт, Тени ял тăрăхĕсен командисем хутшăнчĕç. Спорт мероприятине район администрацийĕн вĕренÿ пайĕн начальникĕ Эдуард Николаев уçрĕ, спортсменсене ăнăçу сунчĕ.

Ăмăртăва çамрăксене физкультурăпа спорта явăçтарас, сывă пурнăç йĕркине пăхăнса пурăнма хăнăхтарас тĕллевпе ирттерчĕç. Мероприяти савăнăçлă та çивĕч пулчĕ. Тавăт ял тăрăхĕн команди пĕрремĕш вырăн çĕнсе илчĕ. Иккĕмĕш вырăна ехремкассисем тухрĕç. Виççĕмĕшĕнче - йăлкăшсем пулчĕç.

Çĕнтерÿçĕсемпе призерсене Хисеп хучĕсем, медальсем тата парнесем парса чысларĕç.