Февралĕн 13-мĕшĕнче оборонăпа массăллă тата спорт ĕçĕсен уйăхлăхĕнче Чăваш Енре пограничниксем хушшинче пĕчĕк калибрлă винтовкăран перессипе харпăр хăй тата команда зачетĕнче ăмăрту иртрĕ. Ăна совет салтакĕсене Афган вăрçинчен илсе тухнăранпа 27 çул çитнине тата Тăван çĕршыва хÿтĕлекенсен кунне халалласа ирттернĕ. Унта Шупашкар хулинчи, Çĕрпÿ, Етĕрне, Хĕрлĕ Чутай, Элĕк, Çĕмĕрле, Комсомольски районĕсенчи ветеран пограничниксем хутшăнчĕç.

Мероприятие «Пограничниксен пĕрлĕхĕ» пĕрлешĕвĕн ертÿçи Анатолий Шорников тата унăн çумĕ Сергей Андреев, «Раççейри ДОССАФăн республикăри пăшал перессипе ĕçлекен спорт клубĕ» учрежден ин начальникĕ Андрей Корш, афганецсен ăмăртăвĕсен тĕп судйи Алексей Волков тата Алексей Ефремов афганец уçрĕç.

Команда зачетĕнче Элĕк команди те тупăшрĕ. Пирĕн район чысне Борис Степанов (Элĕк), Виктор Осипов (Элĕк), Владимир Захаров (Торпкасси) хÿтĕлерĕç. Çивĕч тупăшура пирĕн район команди иккĕмĕш вырăн çĕнсе илчĕ. Харпăр хăй зачетĕнче çĕнтернисене «Пограничниксен пĕрлĕхĕ» пĕрлешĕвĕн медалĕсемпе тата Хисеп хучĕсемпе чысларĕç.

Борис Степанов.