Çу кунĕсем пуçланнăранпа хĕвел самаях сапалать хăйĕн ăшшине. Кун пек çанталăк вара çынсене уçă сывлăша йыхравлать тейĕн. Чылайăшĕ канăва усăллă та интереслĕ ирттерес тĕллевпе вăрмансене шашлăка тухать е ытти çĕрте кăвайт чĕртет. Çакă вара пушар тухас хăрушлăха ÿстерет. Инкекрен асăрхаттарас тата унран сыхланас тĕлĕшпе район администрацийĕн пуçлăхĕ Александр Куликов ятарлă постановлени кăларнă. Унта апрелĕн 29-мĕшĕнчен пуçласа районта пушар хăрушсăрлăхĕпе уйрăмах çирĕп йĕрке йышăннине палăртнă.

Асăннă постановленипе килĕшÿллĕн кăвайтсем чĕртме, коммуналлă хытă каяшсене, çÿп-çап, çĕр лаптăкĕсем çинче, вăрмансем, ял хуçалăх пĕлтерĕшлĕ çĕрсем çывăхĕнче типĕ курăка çунтарма юрамасть.

Асăннă йĕркесене пăхăнманнисене РФ административлă майпа явап тыттарасси çинчен калакан Кодексăн 20.4-мĕш статйин 2-мĕш пайĕпе явап тыттараççĕ. Граждансене 2-3 пин тенкĕ, ĕçлĕ çынсене 15-20 пин, юридици çыннисене 200-400 пин тенкĕ штраф тÿлеттереççĕ. Районта пушар хăрушсăрлăхĕпе уйрăмах çирĕп йĕрке пулнă тапхăрта ял тăрăхĕсен пуçлăхĕсен те ку енĕпе хушма мерăсем йышăнмалла.

В.ПРОКОПЬЕВ,

Элĕкри пушар надзорĕн пайĕн начальникĕ.