«Вĕлле хурчĕ - ылтăн хурт», - теççĕ халăхра. Этеме çав тери усăллă та сиплĕ çимĕçпе савăнтарнăран пысăках хурса хаклаççĕ те ĕнтĕ çак хурт-кăпшанкăна. Юлашки тапхăрта Чăваш Сурăм тăрăхĕнчи ялсенче «ылтăн хурт» тытакансен шучĕ палăрмаллах ÿсрĕ. Анатри Хурасанти Владислав Степановпа Валерий Осипов ку енĕпе чăн-чăн ăстасем. Çавăн пекех Шуркассинчи Алексей Николаев та тин çеç вĕлле хурчĕсене ĕрчетме пуçлакансене яланах пулăшма хатĕр. Тури Юлăшри Геннадий Андреевăн та вĕлле хурчĕсем сахал мар, çулсеренех япăх мар тухăç илет-ха ăста. Пĕчĕк Шĕвĕшри Михаил Ивановпа Тури Хурасанти Виталий Филиппов ку тутлă та сывлăхшăн питех те усăллă çимĕçпе ял-йыша та сăйлаççĕ, пасарсене илсе тухса сутаççĕ.