2015 çулхи октябрĕн 19-23-мĕшĕсенче Аслă Çĕнтерÿ тунăранпа 70 çул çитнине тата Литература çулталăкне халалласа литература произведенийĕсене экранизациленĕ Ялти пĕрремĕш кинофестиваль иртрĕ. Асăннă кинофорума ялсенче Чăваш Республикин электрон тата кинодокументаци Патшалăх архивне «ЛУКОЙЛ» компанин ыркăмăлăх фончĕ пулăшнипе пурнăçа кĕртме май килчĕ. Пĕлтĕр Етĕрне, Муркаш, Элĕк, Çĕрпÿ районĕсенче тата Кÿкеç поселокĕнче пурăнакансемшĕн фестиваль кино уявĕ вырăнĕнчех пулчĕ. Çынсем çак мероприятие хапăлласа йышăннăран асăннă проекта малалла тăсма шутларăмăр. Ку хутĕнче ăна Раççейри Кино çулталăкне тата наци кинематографине халалласа ирттерме палăртрăмăр. Ялти черетлĕ кинофестиваль кăçал Чăваш Республикинче октябрĕн 17-21-мĕшĕсенче «Юрататăп сана, манăн тăван ен!» ятпа иртет. Пилĕк кун хушшинче вăл Элĕк салине, Сĕнтĕрвăрри хулине тата Шупашкар районĕнчи Ишлей салине, Пархикасси ялне тата Çĕнĕ Атлаш поселокне çитĕ.

Ялти иккĕмĕш кинофестивале кăçал савăнăçлă лару-тăрура октябрĕн 17-мĕшĕнче Элĕк салинче 13.00 сехетре уçатпăр.

Фестиваль программи пуян. Унта хамăрăн çĕршывра кăларнă киносемпе тата наци киноискусствипе, актерсемпе, режиссерсемпе те паллашма май пур. Çавăн пекех кăçалхи кино уявĕ валли Чăваш Республикин Патшалăх архивĕн ĕçченĕсем фильмфондăн кинодокуменчĕсемпе усă курса районсен историйĕпе паллаштаракан кĕске илемлĕ фильмсем хатĕрлерĕç. Çакă вара çамрăксемшĕн уйрăмах интереслĕ пулмалла.

Кинофестиваль вăхăтĕнче киносене «Киномобиль» нумай функциллĕ мобильлĕ культура центрĕ пулăшнипе кирек ăçта та пысăк пахалăхпа пăхма пулать.

Элĕксем фестиваль уçăлнă кун «Хорло» тата «Единичка» художествăлла фильмсем курма пултараççĕ. Çавăн пекех Марат Никитин режиссерпа тата сценаристпа паллашма май пулĕ. Сăмах май, «Хорло» илемлĕ фильмра пирĕн ентеш, Чăваш Сурăм салинче çуралса ÿснĕ Дмитрий Михайлов та ÿкерĕннĕ, вăл та кинофестивальте пулĕ.

Майя Александрова,

Патшалăх архивĕн тĕп архивисчĕ.