Район 1927 çулта сентябрĕн 5-мĕшĕнче ВЦИК Президиумăн Постановленийĕпе килĕшÿллĕн пуçланса кайнă. Унăн историйĕ тĕрлĕ пулăмпа пуян. 90 çул хушшинче районта Элĕксемшĕн пысăк улшăнусем пулса иртнĕ. Пурнăç условийĕсем те тĕппипех лайăхланнă. Элĕк çĕрĕ çут çанталăк ресурсĕсемпе кăна мар, пултаруллă çыннисемпе те пуян. Вĕсем района тĕрлĕ енчен аталанма пулăшаççĕ.

Ехремкасси ял тăрăхĕ тата Вутлан микрорайонĕ Элĕк районĕн пĕчĕк пайĕ шутланаççĕ. Çавна май асăннă ялсенчи библиотекăсенче ку тăрăхри паллă çынсем пирки пуян материал хатĕр- ленĕ. Ехремкасси ял библиотекин заведующийĕ Алина Андреева пĕлтернĕ тăрăх, вулавăшра вырăнти писательсемпе поэтсем çинчен тата вĕсен хайлавĕсем пирки курав хатĕрленĕ. Сăмахран, Ехремкассинче çуралса ÿснĕ Наум Урхи, Качалаври Владимир Терентьев-Тăвăл хайлавĕсемпе, Елена Ильина сăввисемпе, Зоя Аббанникова пьесисемпе тата ытти вырăнти пултаруллă çынсен ĕçĕ-хĕлĕпе паллашма пулать. Çавăн пекех кунта иртнĕ çулсенче ĕçленĕ колхоз историйĕ çинчен пĕлме, малтанхи сăн ÿкерчĕксене, альбомсене курма пулать.

Шкулта ĕçленĕ вĕрентекенсен, директорсен сăн ÿкерчĕкĕсене те стенд çине вырнаçтарнă. Унсăр пуçне Ехремкасси ял тăрăхне кĕрекен ялсен вăрттăнлăхĕсене, салтак йăхĕсене, ял тата улăх-çаран, çырма, вар вăрттăнлăхĕсене те унта кĕртнĕ. Вăрçă ветеранĕсен, салтак арăмĕсен аса илĕвĕсем, пĕрремĕш трактористка, тĕрлĕ династи пирки материалсем кĕртнĕ.

Вутлан ял библиотеки те пултаруллă çынсем тата тăван тавралăх пирки пуян та анлă материал хатĕрленĕ. Район юбилейне халалласа мероприятисем ирттермелли планне те пăхса хунă.

Библиотекăсенче ял çыннисемпе хăнасене валли район юбилейĕпе саламлама альбом та пуçланă.

А.Туванская.