Çĕнĕ вĕренÿ çулĕ пуçланчĕ. Эппин, çулсем çинче ачасен йышĕ палăрмаллах ÿсет. Çакна тĕпе хурса çĕршывăн мĕнпур регионĕнче «Асăрханăр - ачасем!» профилактика операцийĕ иртет. Август уйăхĕн 28-мĕшĕнчен пуçласа сентябрĕн 10-мĕшĕччен çул-йĕр хăрушсăрлăхĕн инспекторĕсем çулсем çинче ачасене хăрушсăрлăхпа тивĕçтерес тĕлĕшпе тĕрлĕ мероприяти ирттереççĕ. Çавăн пекех вĕренÿ учрежденийĕсенчи педагогсемпе пĕрле çул çинче, автотранспорт йышлă çÿрекен вырăнсенче хăйсене мĕнле тытмаллине асăрхаттарас тĕлĕшпе уçă уроксем йĕркелеççĕ. Тĕрлĕ конкурссемпе викторинăсем ирттерсе çул-йĕр хăрушсăрлăхĕн правилисене аса илтереççĕ.

Çакна палăртмалла, аслисен ăссăрлăхне пула яланхиллех ачасем инкек тÿсеççĕ. Çулталăк пуçланнăранпа республикăри автомобиль çулĕсем çинче çула çитмен 14 çамрăкăн пурнăçĕ татăлнă, вĕсенчен 9-шĕ 16 çула та çитмен. Сăмах май, вĕсенчен нумайăшĕ транспорт çинче пассажир вырăнĕнче çеç пулнă. Çуллахи каникул тапхăрĕнче кăна республика территорийĕнче ачасем хутшăннипе 67 авари пулни те пире аслисене сисчĕвлентермелле.

Çавăнпа та профилактика операцийĕ вăхăтĕнче çул-йĕр хăрушсăрлăхĕн инспекторĕсем ачасем çине çеç мар, ашшĕ-амăшĕ çине те пысăк тимлĕх уйăрĕç. Аслисене хăвăртлăх йĕркине, çуран каçмалли вырăнсенче, автомашинăпа çамрăк пассажирсене турттарнă чухне правилăсене пăхăнмаллине асăрхаттарĕç. Уйрăмах пĕрремĕш хут парта хушшине ларакан ачасен ашшĕ-амăшне тимлĕхе ÿстерме сĕнесшĕн. Пĕчĕкскерсене шкула ăсатсан тата унтан кĕтсе илсен аванрах. Ку чухне ачана «кил - шкул - кил» маршутпа кайнă чухне хăш-хăш вырăнта уйрăмах тимлĕ пулмаллине тĕплĕн ăнлантарăр. Ăçтан кайма юраманнине те хытарсах калăр.

Автотранспорт водителĕсен те шкулсемпе ача сачĕсем çывăхĕнчи çулсем çинче тимлĕхе ÿстермелле, автотранспорт хăвăртлăхне чакармалла. Кирек хăш самантра та çул çине ача чупса тухма пултарасси çинчен нихăçан та ан манăр.

В.ПЕТРОВ,

«Вурнарский» районсем хушшинчи çул-йĕр хăрушсăрлăх инспекцийĕн начальникĕ.