Сентябрь уйăхĕнчен пуçласа Элĕкри вăтам шкулта аслă классенче вĕренекенсемпе финанс пĕлÿлĕхĕ енĕпе уроксем ирттерме пуçланă. Эдикт Волков вĕрентекен пĕлтернĕ тăрăх, çак занятисене укçа-тенкĕн хăрушсăрлăхĕпе çыхăнтарнă. Çавăн пекех унта социаллă страховани çине те тимлĕх уйăрнă.

Вĕренекенсене уйрăмах виртуаллă укçа-тенкĕ, сăмахран, биткоин интереслентерет. Малашнехи уроксенче электронлă укçасем, мошенниксем пирки калаçусем пулĕç.

Унсăр пуçне Тенири тĕп шкулта та кун йышши урок иртнĕ. 7-8-мĕш классенче вĕренекенсем урокра çемье бюджечĕ мĕнрен тăни, ăна мĕнле йĕркелени тата тупăшпа тăкак хушшинчи уйрăмлăхсем çинчен пĕлнĕ тата «Çемье бюджечĕ» ĕçлĕ вăййа хутшăннă.