Малтанлăха палăртнă тăрăх, кăçал районта ял хуçалăх культурисем 20119 гектар йышăнмалла, пĕлтĕрхипе танлаштарсан - 101,5 процент. Уйрăммăн илсен, çурхи тĕш тырăсем 7272 гектар пулĕç. Мĕнпур категориллĕ хуçалăхсенче çĕр улмине 850 гектар лартмалла, çав шутран ял хуçалăх предприятийĕсемпе хресчен-фермер хуçалăхĕсенче 408 гектар, килти хушма хуçалăхсенче - 442 гектар. Пахча çимĕçсене 279 гектар акса-лартма палăртнă. Акăнакан лаптăксен тытăмĕнче пĕрчĕллĕ тата пăрçа йышши культурăсем 50 процент ытла, выльăх апачлĕх культурăсем - 44,3, çĕр улми - 4,9, пахча çимĕçсем 0,9 процент йышăнĕç. Çĕр ĕçченĕсен тĕп тĕллевĕ - выльăх-чĕрлĕх отрасльне утă-улăмпа, ытти тутлăхлă апатсемпе туллин тивĕçтересси. Кăçалхи тухăçшăн тăрăшса, тĕш тырăсене тырăлăх тата симĕс апатлăх 2480 гектар акса хăварнă. Кĕрхи çĕртме сухине 4200 гектар тунă.